என்றும் அன்புடன்

புத்தகத்தினூடே ஒளித்து வைக்கும்
மயிலிறகைப் போல்
வலிகளையெல்லாம் புன்னகைக்குள்
மறைத்து வைக்கிறேன் !
ஒவ்வொரு பக்கத்தின் மயிலிறகும்
உன்னால் எடுத்து
அன்பால் முத்தமிடப்படுகிறது !
எல்லாம் சேர்த்து மயில் தோகையாக்கி
பரிசளித்துச் சிரிக்கிறேன் !
இந்த சிரிப்பும் உன் அன்பும்
எப்போதும் போல்
வாழ்க்கையை எனதாக்கி
பூக்கள் தூவிச் செல்கிறது !!

அன்பை அமுதமாய் அளிக்கும்
ஆற்றல் எல்லோருக்கும் இருப்பதில்லை !
மனிதர்களை அவர்களின் மனதிற்காக
நேசிக்கும் உள்ளங்கள் மிகக் குறைவே !
கேட்காமல் கிடைத்த வரமாய்
அடைமழையாய்ப் பொழியும் அன்போடு
குறைகள் கடந்து
பேதங்கள் மறந்து
உயிரோடு உறவாடும் திறன்
நட்பிற்கு மட்டுமே சாத்தியம் !